ایف ڈی اے سٹی سپورٹس کمپلیکس کا اعلیٰ نظم ونسق اولین ترجیح ہے، آصف چوہدری
فیصل آباد (94 نیوز) ڈائریکٹر جنرل ایف ڈی اے محمد آصف چوہدری نے کہا ہے کہ ایف ڈی اے سٹی سپورٹس کمپلیکس کے امور بارے اعلیٰ نظم ونسق اولین ترجیح ہے اس ضمن میں معیار اور وقار قائم کرنے کیلئے انتظامی لحاظ سے شعوری کوششیں جاری رکھی جائیں۔ انہوں نے یہ بات ایف ڈی اے سپورٹس کمپلیکس کے انتظامی امور احسن انجام دہی کے لئے نئی تعینات ہونیوالی منیجر رضوانہ کمال سے ملاقات کے دوران کہی۔ ڈائریکٹر فنانس یاسر اعجاز چٹھہ اوردیگر افسران موجود تھے۔ ڈائریکٹر جنرل نے پر عزم منیجرکی تعیناتی کا خیر مقدم کرتے ہوئے کہا کہ بین الاقوامی معیار کی سہولیات پر مشتمل سپورٹس کمپلیکس ایف ڈی اے سٹی کھیلوں کے شائقین کیلئے گرانقدر منصوبہ ہے جس کو کامیابی سے چلانے کیلئے منیجرسمیت دیگر سٹاف کی محنت اور گہری دلچسپی ناگزیر ہے۔انہوں نے تاکید کی کہ مرد و خواتین کے لئے سوئمنگ پولز، جمینریم، بیڈ منٹن، باسکٹ بال، لان ٹینس، ٹیبل ٹینس ودیگر ان ڈور گیمز کے تمام کورٹس کو ہمہ وقت فعال رکھاجائے اس ضمن میں ممبرز کی آسانی اور سہولیات کا خصوصی خیال رکھاجائے۔انہوں نے سپورٹس کمپلیکس میں سی سی ٹی و ی کیمروں کے انتظامات کو موثر بنانے اور کھیلوں کی سرگرمیوں کی مکمل مانیٹرنگ کی ہدایت کرتے ہوئے کہاکہ سپورٹس کمپلیکس کیلئے مقررہ اخلاقی ضابطوں کی مکمل پاسداری ہونی چاہئے۔انہوں نے ممبرز سے مکمل رابطہ رکھنے اور سہولیات کے معیار نظم وضبط کے بارے میں فیڈ بیک حاصل کرنے کی ہدایت کی اور کہاخوشگوار ماحول برقرار رکھنے کے سلسلے میں کوئی سستی یاکوتاہی نہ کی جائے۔ انہوں نے سپورٹس کمپلیکس کی تمام تنصیبات اور املاک کی مکمل دیکھ بھال و حفاظت کرنے کا حکم دیااور کہا کہ جمینزیم کی مشینری سمیت دیگر ساز و سامان چالو حالت میں رکھے جائیں۔ ڈائریکٹر جنرل نے بعض نشاندہی پر ضروری تقاضوں کو پورا کرنے کا حکم دیا۔ منیجر سپورٹس کمپلیکس رضوانہ کمال نے منصوبے کو بین الاقوامی معیار کے عین مطابق قرار دیتے ہوئے مختلف ان ڈور گیمز میں شائقین کی گہری دلچسپی کے بارے میں بتایا اور کہا کہ خصوصی طور پر خواتین سوئمنگ پولز، جمینزیم اوردیگر گیمز میں پرجوش انداز میں حصہ لے رہی ہیں۔ انہوں نے انتظامی معاملات کو ادارہ و ممبرز کی توقعات کے عین مطابق رکھنے کا یقین دلایا اور کہا سپورٹس کمپلیکس کی ترقی و استحکام جدید رجحانات و اصلاحات کو فروغ دینے میں ہمہ جہت اقدامات تجویز کئے جائیں گے۔
