جی سی یونیورسٹی فیصل آباد، کیو ایس سبجیکٹ رینکنگ 2026 میں عالمی سطح پر نمایاں
فیصل آباد (94 نیوز سٹی رپورٹر) گورنمنٹ کالج یونیورسٹی فیصل آباد نے بین الاقوامی تعلیمی میدان میں ایک اہم سنگِ میل حاصل کرتے ہوئے کیو ایس ورلڈ یونیورسٹی رینکنگز بائے سبجیکٹ 2026 میں اپنے پانچ مضامین کو عالمی سطح پر نمایاں مقام دلایا ہے۔ یہ کامیابی ایک سرکاری جامعہ کے طور پر گورنمنٹ کالج یونیورسٹی فیصل آباد کے تحقیق، تدریس اور عالمی تعلیمی منظرنامے میں مؤثر کردار کی عکاسی کرتی ہے۔ رینکنگ کے مطابق شعبہ زراعت 301–350، فارمیسی 351–400، جبکہ کیمسٹری اور ریاضی 451–500 کی درجہ بندی میں شامل ہوئے ہیں۔ اسی طرح حیاتیات (بائیولوجی) کو 601–650 کی عالمی درجہ بندی میں جگہ ملی ہے۔ کیو ایس سبجیکٹ رینکنگز کا تعین اہم اشاریوں جیسے اکیڈمک شہرت، آجرین کی رائے، تحقیقی حوالہ جات (سائٹیشنز) اور بین الاقوامی تحقیقی روابط کی بنیاد پر کیا جاتا ہے، اور انہیں دنیا بھر میں جامعات کی کارکردگی جانچنے کے لیے ایک معتبر معیار سمجھا جاتا ہے۔ یہ کامیابی جی سی یونیورسٹی کی مضبوط تعلیمی بنیاد، معیاری تعلیم کے فروغ اور مختلف شعبہ جات میں متحرک تحقیقی ماحول کی عکاس ہے۔ اس موقع پر وائس چانسلر پروفیسر ڈاکٹر رؤف اعظم نے اساتذہ، طلبہ اور پوری جی سی یونیورسٹی کمیونٹی کو مبارکباد دیتے ہوئے کہا کہ عالمی سطح پر یہ اعتراف جامعہ کے تدریسی و تحقیقی عملے کی مشترکہ کاوشوں کا نتیجہ ہے۔ انہوں نے مزید کہا کہ یہ کامیابی دیگر شعبہ جات کے لیے بھی حوصلہ افزا ہے کہ وہ اپنی تعلیمی اور تحقیقی کارکردگی کو مزید بہتر بناتے ہوئے عالمی درجہ بندی میں نمایاں مقام حاصل کریں۔
