پی پی 99: تیمور شاہد خاں کا موجودہ سیاسی صورتحال اور نئے سال کے عزم پر اظہارِ خیال
فیصل آباد (94 نیوز)پی پی 99 سے پاکستان تحریک انصاف کے متحرک رہنما تیمور شاہد خاں نے موجودہ سیاسی صورتحال اور نئے سال کے عزم پر اظہارِ خیال کرتے ہوئے کہا ہے کہ معاشرے میں بڑھتے ہوئے زمین اور جائیداد کے تنازعات نہ صرف قانونی مسائل کو جنم دے رہے ہیں بلکہ یہ امن و امان کے لیے بھی ایک سنگین خطرہ بنتے جا رہے ہیں۔انہوں نے کہا کہ ماضی میں زمین کے جھگڑے محض معمولی تکرار اور باہمی اختلافات تک محدود ہوتے تھے، مگر بروقت انصاف نہ ملنے اور طاقتور عناصر کی مداخلت کے باعث یہ تنازعات شدت اختیار کرتے گئے، جو بعض علاقوں میں قتل و غارت جیسے سنگین جرائم کا سبب بنے۔ ان واقعات کے بعد متاثرہ خاندان معاشی طور پر کمزور ہو گئے اور خوف و ہراس کی فضا نے پورےمعاشرے کو اپنی لپیٹ میں لے لیا۔تیمور شاہد خاں نے مزید کہا کہ اسی کمزوری سے فائدہ اٹھاتے ہوئے جرائم پیشہ عناصر نے زمینوں پر ناجائز قبضے، اسلحے کے بے دریغ استعمال اور طاقت کے زور پر فیصلوں کا سلسلہ شروع کیا، جس کے نتیجے میں چوری، ڈکیتی اور غنڈہ گردی ایک منظم دھندے کی شکل اختیار کر گئی۔ خوف کے باعث لوگ خاموش ہو گئے، گواہیاں ختم ہوئیں اور مجرم مزید مضبوط ہوتے چلے گئے۔انہوں نے نئے سال کے عزم کا اعادہ کرتے ہوئے کہا کہ پی ٹی آئی کی قیادت اور کارکنان قانون کی بالادستی، بروقت انصاف اور عام شہری کے جان و مال کے تحفظ کے لیے جدوجہد جاری رکھیں گے۔ ان کا کہنا تھا کہ زمین اور جائیداد کے تنازعات کا منصفانہ، شفاف اور قانونی حل ہی معاشرے میں امن و سکون کی بحالی کی ضمانت ہے۔آخر میں تیمور شاہد خاں نے کہا کہ پی پی 99 کے عوام کے ساتھ مل کر وہ ایک ایسے نظام کے لیے آواز بلند کرتے رہیں گے جہاں طاقت نہیں بلکہ قانون کی حکمرانی ہو، اور ہر شہری خود کو محفوظ محسوس کرے۔
