واسا نے مون سون ایمرجنسی ریلیف کیمپس 10 سے بڑھا کر 19 کردئیے
فیصل آباد (94 نیوز سٹی رپورٹر) مینجنگ ڈائریکٹر واسا عامر عزیز نے موسم برسات کے دوران ایمرجنسی ریلیف کیمپس کی تعداد 10 سے بڑھا کر 19 کردی ہے جبکہ آپریشنز سٹاف کو چوبیس گھنٹے ہائی الرٹ کردیا اور واضح کیا ہے کہ بارش شروع ہونے کے ساتھ ہی آپریشنز سٹاف نکاسی آب کے لئے متحرک ہوجائے۔
انہوں نے مزید کہا کہ مون سون کے دوران کسی بھی ہنگامی صورتحال سے نمٹنے کے لئے آپریشنز سٹاف مکمل متحرک اور تمام مشینری آپریشنل ہے جبکہ ڈسپوزل اسٹیشنز پر متبادل انرجی کے طور پر جنریٹر استعمال کئے جائیں۔ ایم ڈی واسا نے واضح کیا کہ وزیراعلیٰ پنجاب مریم نواز شریف کی ہدایت پر شہر بھر میں 9،ایمرجنسی ریلیف کیمپس قائم کئے گئے تاہم اب ان کی تعداد بڑھا کر19 کر دیا گیا ہے اور تمام ریلیف کیمپس پر آپریشنز سٹاف کی حاضری اور متعلقہ سامان کی دستیابی یقینی بنائی جا رہی ہے۔ انہوں نے مزید کہا کہ واسا فیصل آباد مون سون سیزن میں شہریوں کو نکاسی آب کی معیاری سہولیات کی فراہمی کے لئے تمام دستیاب وسائل بروئے کار لا رہا ہے جبکہ واسا کا مون سون کنٹرول سیل بھی چوبیس گھنٹے فعال ہے جو شہریوں کی شکایات کے اندراج اور ان شکایات کو متعلقہ فیلڈ افسران تک پہنچانے کے لئے پیشہ وارانہ طریقے سے اپنی ذمہ داریاں انجام دے رہا ہے۔مینجنگ ڈائریکٹر نے واضح کیا کہ کسی بھی قسم کی شکایات کے لئے فری ہیلپ لائن1334 پر رابطہ کر سکتے ہیں۔
