سینیٹ میں 8فروری کو عام انتخابات مؤخر کرنے کی قرارداد کثرت رائے سے منظور

اسلام آباد(94 نیوز) سینیٹ میں 8فروری کو عام انتخابات مؤخر کرنے کی قرارداد کثرت رائے سے منظورکرلی گئی۔

تفصیلات کے مطابق 8فروری کو انتخابات ملتوی کرنے کی قرارداد سینیٹر دلاور خان نے پیش کی، قرارداد میں مؤقف اختیار کیا گیا ہے کہ اکثرعلاقوں میں سخت سردی ہے، ان علاقوں کی الیکشن عمل میں شرکت مشکل ہے، جے یو آئی ایف ارکان اور محسن داوڑ پر حملہ ہوا، کے پی اور بلوچستان میں سیکیورٹی فورسز پر حملےہوئے ہیں۔  قرارداد میں کہا گیاہے کہ الیکشن کمیشن 8فروری کا الیکشن شیڈول معطل کرے،الیکشن کے انعقاد کیلئے سازگار ماحول فراہم کیا جانا چاہیے۔

مسلم لیگ( ن) کے سینیٹر افنان اللہ اور نگران وزیراطلاعات مرتضیٰ سولنگی نے انتخابات ملتوی کرنے کی مخالفت کی۔

سینیٹر افنان اللہ نے کہاکہ میں سینیٹر دلاور خان کی وجوہات کو درست کرنا چاہتا ہوں،ملک میں سیکیورٹی کے حالات ٹھیک نہیں لیکن 2008اور 2013میں حالات اس سے زیادہ خرا ب تھے،سیکیورٹی کا بہانہ کرکے الیکشن ملتوی کریں گے تو کبھی الیکشن نہیں ہوں گے۔

جس پر چیئرمین سینیٹ صادق سنجرانی نے ووٹنگ کرائی، سینیٹ میں 8فروری کو الیکشن ملتوی کرانے کی قرارداد کثرت رائے سے منظور کرلی گئی۔