نگران صوبائی وزیر صحت کا فیصل آباد دورہ، الائیڈ ہسپتال کے جاری کام کا بھی معائنہ

فیصل آباد(94 نیوز) نگران صوبائی وزیر صحت پروفیسر ڈاکٹر جاوید اکرم نے فیصل آباد کا دورہ کیا۔ انہوں نے الائیڈ ہسپتال کی سرجیکل ایمرجنسی و اوپی ڈی اور نیو بلاک کی اپ گریڈیشن کے جاری کام کا بھی معائنہ کیا۔

صوبائی وزیر نے کہا کہ نگران وزیراعلی پنجاب محسن نقوی نے شعبہ صحت پر بھرپور توجہ مرکوز کررکھی ہے اور خطیر فنڈز سے فیصل آباد کے ہسپتالوں کی ری ویمپنگ کی جارہی ہے۔انہوں نے کہا کہ صوبہ بھر میں 100 ہسپتالوں کی مرمت وبحالی اور وسعت کے منصوبے مکمل کئے جارہے ہیں اوربیشتر ہسپتالوں کی اپ گریڈیشن مکمل جبکہ باقی ماندہ ہسپتالوں کا کام 31 جنوری 2024ء تک مکمل کرلیا جائے گا۔نگران صوبائی وزیر نے ایمرجنسی،اوپی ڈی اور نیو بلاک کا دورہ کیا اور تعمیراتی مراحل کا جائزہ لیتے ہوئے کہا کہ الائیڈ ہسپتال کی اپ گریڈیشن سے مریضوں کو علاج معالجہ میں مزید بہتری ملے گی۔نگران صوبائی وزیر نے تعمیراتی عمل میں تیزی لانے اور شفافیت کو ہر صورت ملحوظ خاطر رکھنے کی تاکید کی۔انہوں نے کہا کہ اپ گریڈیشن کا کام مقررہ ٹائم فریم میں ہر صورت مکمل ہونا چاہیے۔انہوں نے کہا کہ میگا پراجیکٹ کی مکمل مانیٹرنگ جاری رہے گی۔وائس چانسلر فیصل آباد میڈیکل یونیورسٹی پروفیسر ڈاکٹر ظفر علی چوہدری،میڈیکل سپرنٹنڈنٹ ڈاکٹر محمد فہیم یوسف اور دیگر ڈاکٹرز بھی موجود تھے۔