ویسٹ مینجمنٹ کمپنی کےزیر اہتمام ہفتہ صفائی کے آغاز پر شہر میں فلیٹ مارچ

فیصل آباد(94 نیوز) ڈپٹی کمشنر فیصل آباد / چیئرمین ایف ڈبلیو ایم سی محمد علی کی ہدایت پر فیصل آباد ویسٹ مینجمنٹ کمپنی کے زیر اہتمام ہفتہ صفائی کے آغاز پر شہر میں فلیٹ مارچ کا انعقاد کیا گیا۔ مارچ کی قیادت سی ای او ویسٹ مینجمنٹ کمپنی کاشف رضا اعوان نے کی۔ انکے ہمراہ جی ایم آپریشن کرنل (ر) عماد اقبال گل، سینئر منیجر آپریشن محمد اعجاز بندیشہ و دیگر افسران بھی موجود تھے۔ فلیٹ مارچ کے دوران کم و بیش 40 آپریشنل وہیکلز کے ساتھ شہر کا چکر لگایا گیا جس میں خصوصی طور پر عوامی آگاہی کیلئے فلوٹ وہیکلز اور کارٹون کریکٹرز کا بھی استعمال کیا گیا۔ فلیٹ مارچ کا آغاز ایف ڈبلیو ایم سی کمپلیکس سے کیا گیا جس کے بعد گاڑیوں کا قافلہ جی ٹی ایس چوک، عبداللہ پور،سوساں روڈ اور ڈی گراونڈ سے ہوتا ہوا جھال چوک سے واپس ایف ڈبلیو ایم سی کمپلیکس پہنچا۔ فلیٹ مارچ میں سٹیٹ آف دی آرٹ مکینیکل مشینری کا استعمال کیا گیا جن میں ایف ڈبلیو ایم سی کے منی ٹپرز، ہیوی ڈیوٹی ڈمپرز، کمپیکٹرز، مکینیکل سویپر، مکینیکل واشر اور واٹر باوزرز و دیگر ہیوی مشینری شامل تھی۔