قومی

ٹریفک قوانین کی پاسداری مہذب قوموں کا شعار ہے، ڈپٹی کمشنر

ٹریفک شعور اجاگر کرنے کیلئے ایجوکیشن یونٹ مستعدی سے مصروف عمل ہے، سی ٹی او

فیصل آباد (94 نیوز) ڈپٹی کمشنر محمد علی نے کہا ہے کہ ٹریفک قوانین کی پاسداری مہذب قوموں کا شعار ہے جس کی بدولت نہ صرف منظم اور محفوظ ٹریفک کو یقینی بنایا جا سکتا ہے بلکہ شاہرات پر شہریوں کے اچھے رویوں کی بھی پہچان ہوتی ہے۔ انہوں نے یہ بات سٹی ٹریفک پولیس کے زیر اہتمام ٹریفک آگہی واک کی قیادت کرتے ہوئے کہی جس میں سی ٹی او سردار آصف‘ ڈی ایس پی ٹریفک سٹی زاہدہ پروین‘ ٹریفک سٹاف‘ تاجروں‘ طالب علموں اور سول سوسائٹی کے نمائندہ افراد نے شرکت کی۔

واک کے شرکاء نے بینرز اور پلے کارڈز اٹھا رکھے تھے جن پر ٹریفک قوانین کی پابندی‘ ہیلمٹ کے استعمال‘ سڑکوں کے حادثات سے بچاؤ سے متعلق نعرے اور ٹریفک قوانین سے آگاہی کے پیغامات درج تھے جبکہ شہریوں میں دھند کی صورت میں احتیاطی تدابیر سے متعلق آگاہی کے لئے بمفلٹس بھی تقسیم کئے گئے۔

ڈپٹی کمشنر نے سٹی ٹریفک پولیس کے ایجوکیشن یونٹ کی کاوشوں کو سراہتے ہوئے کہا کہ شہریوں کو ٹریفک قوانین سے آگاہ رکھنا اور ان پر رضا کارانہ عملدرآمد کی ترغیب دینا وقت کی اہم ترین ضرورت ہے کیونکہ آبادی میں اضافے اور ٹریفک کے بڑھتے ہوئے دباؤ کے باعث سڑکوں کے حادثات سے بچاؤ کے لئے احتیاط اور خود حفاظت بے حد ضروری ہے۔ انہوں نے شہریوں سے کہا کہ وہ گاڑیوں کو چلاتے وقت ٹریفک قوانین کی پابندی کرکے ایک باوقار اور مہذب قوم کے شہری ہونے کا ثبوت دیں تاکہ ٹریفک پولیس بہترین مینجمنٹ کرکے ٹریفک کی روانی کو برقرار رکھ سکے۔

سی ٹی او سردار آصف نے کہا کہ ایک انسان کی جان بچانا پوری انسانیت کو بچانے کے مترادف ہے۔ شہریوں میں ٹریفک شعور اجاگر کرنے کے لئے سٹی ٹریفک پولیس کا ایجوکیشن یونٹ مستعدی سے مصروف عمل ہے ہر شہری تک ٹریفک کا پیغام پہچانے کے لئے بھر پور اقدامات کئے جارہے ہیں۔ یہ ٹریفک آگاہی واک اسی سلسلہ کی ایک کڑی ہے اس تسلسل کو آئندہ بھی جاری رکھیں گے۔ انہوں نے واک میں شرکت پر ڈپٹی کمشنر‘ تعلیمی اداروں کے اساتذہ کرام‘ طلبا‘ تاجر برادری اور دیگر معززین کا شکریہ ادا کیا جنہوں نے زندگیوں کو سڑکوں پر تحفظ دینے اور حادثات کی شرح میں کمی لانے کی کاوشوں میں ٹریفک پولیس کی آگاہی مہم بھی بھر پور معاونت کی۔

مزید

متعلقہ خبریں

جواب دیں

Close