PML-N's decision to contact PTI
Lahore (94 news) پاکستان مسلم لیگ ن نے انتخابات کے مشاورتی عمل میں تحریک انصاف کو بھی شامل کرنے کا فیصلہ کرلیا۔
تفصیلات کے مطابق پاکستان مسلم لیگ ن کے قائد میاں نواز شریف کی زیرصدارت مسلم لیگ ن کے سینئر رہنماؤں کا اجلاس ہوا، نواز شریف نے عام انتخابات کا ماحول بنانے سے متعلق پارٹی رہنماؤں سے مشاورت کی اور ملک میں جاری سیاسی کشیدگی کے خاتمے کے لیے پارٹی رہنماؤں کی تجاویز پرغور کیا۔
ذرائع کے مطابق اہم بیٹھک میں معاشرے میں عدم برداشت اور نفرت انگیز سیاسی فضا کو ختم کرنے پر بھی تفصیلی مشاورت ہوئی جبکہ نواز شریف کی تجویز پر آل پارٹیز کانفرنس کی طرز پر تمام جماعتوں کی کانفرنس منعقد کرنے پر بھی تفصیلی مشاورت کی گئی۔ پارٹی رہنماؤں نے نواز شریف کو بطور’’ سٹیٹس مین‘‘ کردار نبھانے کی تجویز دی اور کہا کہ ’آپ نہ صرف ملک بلکہ پورے خطے کے سینئر ترین رہنما ہیں، ملک اور سیاست کو آپ کی خدمات کی مزید ضرورت ہے‘۔ذرائع کے مطابق مسلم لیگ ن نے الیکشن رولز طے کرنے کے لئے تمام سیاسی جماعتوں کو ایک پلیٹ فارمز پر اکٹھا کرنے کا فیصلہ کیا ہے، پارٹی رہنماؤں کی تجویز پر نواز شریف کا ملک کی تمام سیاسی جماعتوں سے رابطوں کا فیصلہ بھی کیا۔
